Sigríður Jóhannesdóttir (andsvar):
Hæstv. forseti. Við afgreiðslu fjárlaga fyrir árið 1999 á síðasta ári var það harðlega gagnrýnt af stjórnarandstöðunni að ekki væri rétt gefið. Útgjöld væru vanáætluð t.d. til heilbrigðismála svo miklu næmi. Þetta hefur reyndar komið á daginn en ljóst að þetta á að bæta að nokkru leyti í fjáraukalagafrv. sem hér liggur fyrir til afgreiðslu. Þó hef ég mjög klára vitneskju um að tapið sem orðið hefur á árinu hjá ýmsum sjúkrastofnunum sem standa mér nærri er margfalt meira en fyrirhugað er að bæta í fyrstu útgáfu fjáraukalaganna.
Ég vil minna á að Heilbrigðisstofnun Suðurnesja, sem fær 21 milljón, er með margfalt meiri halla eftir árið. Það lá fyrir þegar í upphafi ársins að svo mundi verða. Ég vil því spyrja formann fjárln. hvort hann telji að úr þessu verði bætt milli umræðna um fjáraukalög.