Ögmundur Jónasson (andsvar):
Herra forseti. Þetta er náttúrlega það sem menn eru að takast á um. Líka hér skiptast menn í fylkingar. Sumir telja að það sé lögum samkvæmt óþarfi að fara í lögformlegt umhverfismat, að það sé óþarfi samkvæmt þeim lögum sem verið er að vitna í. Aðrir telja að svo sé ekki. Við leggjum áherslu á að þegar um slíkt álitamál er að ræða, þegar slíkt stórmál er á ferðinni, þá eigi enginn vafi að leika á um framkvæmdina. Þetta er okkar skírskotun í málinu.
Varðandi tilfinningar Austfirðinga, þá vitnaði ég sérstaklega í grein eftir Snævar Sigurðsson, þar sem segir m.a., með leyfi forseta:
,,Vandamál byggða á Austfjörðum er líka mikið stórmál og því eðlilegt að fólk gefi tilfinningunum lausan tauminn í baráttunni fyrir sinni heimabyggð.``
Ég vitnaði í þetta og ég tók málið upp á þessum forsendum.