Jón Bjarnason:
Herra forseti. Hér er um afar mikilvægt mál að ræða til leiðréttingar fyrir þá sem þurfa að sækja nám langt að.
Ég vil benda á atriði til viðbótar þeim sem hér hafa komið fram. Síðan kostnaðargrunnurinn var lagður og fyrirheit gefin um þessar 230 millj., hafa orðið stórfelldar húsaleiguhækkanir. Það hafa orðið stórfelldar hækkanir á leigu á húsnæði í Reykjavík. Framhaldsskólar úti á landi í fjárþröng hafa orðið að hækka heimavistargjöld og annan kostnað sem tengist skólahaldinu. Þessi upphæð er því allt of lág miðað við þau markmið og fyrirheit sem hér á að stefna að.