Jón Bjarnason:
Herra forseti. Hér er um stóraukin framlög að ræða til heilbrigðismála og heilbrigðisstofnana í landinu, bæði sjúkrahúsa og heilsugæslustöðva. Í sjálfu sér fögnum við því að komið skuli vera til móts við þann vanda sem þessar stofnanir standa frammi fyrir og sem reyndar var einnig fyrirséður við gerð fjárlaga á síðasta ári fyrir þetta ár.
Við teljum, herra forseti, að þessi vinnubrögð eigi í sjálfu sér að vera miklu skilvirkari en við vísum allri ábyrgð á ríkisstjórnina í þessu máli og sitjum hjá en að sjálfsögðu fögnum við því að tekið er á vanda þessara stofnana.