Umhverfisráðherra (Siv Friðleifsdóttir) (andsvar):
Virðulegi forseti. Brunamálastofnun gerir úttektir af þessu tagi og síðan bera slökkviliðsstjórar á hverjum stað boðin áfram og fylgast með því að farið sé í úrbætur. Ef það er ekki gert hefur Brunamálastofnun ákveðin úrræði samkvæmt lögum til að grípa inn í og ýta á eftir aðgerðum þannig að það kemur ekki til kasta umhvrh. nema mál fari verulega úrskeiðis. Samkvæmt lögum fer ákveðið ferli í gang. Ef menn standa sig ekki gagnvart úrbótum þá eru það slökkviliðsstjórarnir á hverjum stað, í næstversta falli Brunamálastofnun og í versta falli þá ráðuneytið, sem þarf að taka á málunum.
Eins og ég sagði í ræðu minni áðan var skýrsla Brunamálastofnunar ekki mjög upplífgandi. En unnið er að verulegum úrbótum í þeim sveitarfélögum sem við náðum að kynna okkur ástandið hjá núna í gær.