Sverrir Hermannsson:
Herra forseti. Í gærdag sendum við formenn stjórnarandstöðuflokkanna hæstv. forseta svohljóðandi bréf:
,,Það er álit undirritaðra formanna stjórnarandstöðuflokka á Alþingi að frv. til laga um almannatryggingar á þskj. 624 sé óþinglegt með þeim rökum að frv., ef að lögum verður, hrindir dómi Hæstaréttar sem byggður er á ákvæðum stjórnarskrár lýðveldisins, en ákvæði stjórnarskrárinnar hafa þingmenn lagt við drengskap sinn að virða, enda fráleitt að bera fram frv. til laga á Alþingi sem inniheldur lagaákvæði sem brýtur í bága við stjórnarskrá. Því er frv. með öllu óþinglegt og ber að vísa því frá sem óhæfu til afgreiðslu á hinu háa Alþingi. Krafist er úrskurðar hæstv. forseta um þetta efni, enda liggi sá úrskurður fyrir áður en frv. verður tekið til umræðu.``
Virðulegi forseti. Gengið er eftir þessum úrskurði.