Pétur H. Blöndal (andsvar):
Herra forseti. Eins og ég gat um þá styð ég frv. um að breyta Orkubúi Vestfjarða í hlutafélag. Hið háa Alþingi samþykkti nýlega sambærilegt frv. um Hitaveitu Suðurnesja og ég studdi það líka með nákvæmlega sömu rökum. Ég held að sú mikla samkeppni sem að er stefnt í orkugeiranum muni leiða til þess að sífellt fleiri fyrirtæki óska eftir breytingu í hlutafélag. Ég er hlynntur þeirri þróun þannig að ég get ekki verið á móti þessu frv. þó að það kunni að vera eitthvað á bak við það sem ekki er tekin afstaða til enn þá. Ég mun þá taka afstöðu til þess þegar þar að kemur.