Frsm. meiri hluta samgn. (Árni Johnsen) (andsvar):
Herra forseti. Rétt er að árétta að það atriði sem gekk eins og rauður þráður í gegnum umræðu um frv., sérstaklega í viðræðum við aðila úti á landsbyggðinni, var jafn aðgangur, jafn kostnaður að grunnnetinu, að grunnlínu. Þetta áréttar meiri hluti samgn. í áliti sínu eins og ég hef gert grein fyrir.
Varðandi síðari spurningu hv. þm. Jóns Bjarnasonar þá er það ljóst og hefur komið fram, m.a. í samgn., að unnið er faglega að verðlagningu Landssímans sem fyrirtækis. Þessi lög heimila sölu hans. Engar tímasetningar eru uppi enda vart tímabært í smáatriðum að öðru leyti en því sem getið er um í áliti samgn.