Viðskiptaráðherra (Valgerður Sverrisdóttir):
Hæstv. forseti. Ég vil að það komi fram að ég er sammála forseta um að þetta atvik varði ekki virðingu Alþingis og tek fram í því sambandi að ekki er um þingskjal að ræða í þessu tilfelli heldur skýrslu. Hins vegar þótti mér leitt að ekki skyldi vera hægt að dreifa henni fyrr á hv. Alþingi og hef beðist velvirðingar á því.
Ég skal hins vegar bæta því við að mér líkaði frekar illa að heyra hæstv. forseta láta þessi orð falla í gærkvöld en ég fyrirgef honum vegna þess að það er oft þannig að kvöldlagi að það er galsi í þingsalnum og ég skil orð hans í því samhengi.