Rannveig Guðmundsdóttir:
Virðulegi forseti. Þetta er mjög einfalt mál að sjá, fjallar um að innheimta jöfnunargjald samkvæmt 15. gr. laga um fjarskipti og að gjaldið skuli nema 0,12% af bókfærðri veltu eins og hún er skilgreind í 15. gr. laganna um fjarskipti. Ég skil þetta mál þannig, herra forseti, að álagsprósentan sé fyrir 0,10% og verið sé að leggja það til að hún verði hækkuð í 0,12%. Einnig kemur fram, t.d. í máli ráðherra að farið sé fram á ákveðna fjárhæð og í þessu tilfelli er það Neyðarlínan sem hefur farið fram á 20,5 millj. vegna kostnaðar við neyðarsímsvörun.
Það verður að segjast eins og er að mjög erfitt er að leggja mat á þessa fjárhæð eða álagsgjaldið. Það þarf auðvitað að líta á þetta bara í nefnd. Því tel ég að þetta mál sé best komið í allshn. og verði skoðað þar og mun ekki láta í ljós neitt álit á því á þessu stigi.