Kolbrún Halldórsdóttir:
Virðulegi forseti. Brtt. sú sem hér liggur fyrir á sér rætur í þeim hvatningum sem borist hafa frá samtökum lækna víða um heim, m.a. frá læknasamtökum á Íslandi. Hún gengur út á það að höfuðhögg í áhugamannahnefaleikum verði ekki heimiluð og hún leggur þá ábyrgð á herðar Íþrótta- og Ólympíusambandi Íslands að það setji reglur sem sjái til þess að höfuðhögg í öðrum sambærilegum bardagaíþróttum, sem valdi þá væntanlega ámóta skaða og höfuðhögg í áhugamannahnefaleikum geta valdið, verði sömuleiðis bönnuð.
Ég tel þessa tillögu vera tækifæri fyrir alþingismenn á Íslandi til að láta virkilega gott af sér leiða í þessu erfiða máli sem við höfum tekist á um nánast þrjú ár í röð. Ég segi já.