Fyrirspyrjandi (Gunnlaugur Stefánsson):
Herra forseti. Ég hef lagt fram fyrirspurn til hæstv. heilbrrh. um óhefðbundnar lækningar. Margir eru þeirrar skoðunar að óhefðbundnar lækningar séu vaxandi atvinnugrein á Íslandi. Mér skilst að þessar lækningar skiptist í 26 flokka og séu stundum nefndar hjálækningar og jafnvel andalækningar og sum svið þessara lækninga teljist vera á mörkum lækninga og hreinlega trúarbragða.
Mér skilst að engar reglur gildi um þessa starfsemi hér á landi en mér er kunnugt um að svo sé í Bandaríkjunum og á Bretlandi. Í Bandaríkjunum er fullyrt að þessi starfsemi velti um 46 milljörðum dollara á ári og að veltan hafi aukist úr 20 milljörðum á fimm árum. Það er mikilvægt að öðlast yfirsýn yfir þessa starfsemi hér á landi af því að þeim virðist fjölga sem sækjast eftir þessari þjónustu og því hef ég lagt fram eftirfarandi fyrirspurn til hæstv. heilbrrh.:
1. Hefur ráðherra upplýsingar um umfang óhefðbundinna lækninga og árangur þeirra?
2. Hvað áætlar ráðherra að þessi starfsemi velti miklum fjármunum á ári?
3. Hvert er mat ráðherra á slíkum lækningum?
4. Hafa stjórnvöld eitthvert eftirlit með fyrrgreindri starfsemi?
5. Er fyrirhugað að sett verði sérstök löggjöf um óhefðbundnar lækningar?