Jóhann Ársælsson (andsvar):
Hæstv. forseti. Ég fagna því sem hv. þm. sagði um þetta. Mér finnst þetta skipta afar miklu máli og ég ætla bara að vona að hæstv. ráðherra hafi hlýtt á það sem hv. þm. var að segja um þetta og komi hér í sinni ræðu á eftir og taki undir og útskýri nánar hvernig eigi að standa að þessu. Því að það sem ég sagði hér áðan líka var það að þess er hvergi getið í aðgerðaáætluninni hvernig eigi að framfylgja þessu.
En það er náttúrlega auðséð að eigi menn að koma á því ástandi að nýliðun geti orðið í útgerð á Íslandi þýðir það að gjörbreyta þarf fiskveiðistefnunni og losa sjávarútveginn undan því ástandi sem er, þar sem menn þurfa að kaupa veiðiheimildir á himinháu verði, sem þýðir að það er ekki nokkur vegur að nýliðun geti orðið í sjávarútvegi í þeim byggðarlögum sem þarna er verið að lýsa.