[27:01]

Guðmundur Árni Stefánsson (andsvar):

Herra forseti. Hv. þm. er varkár maður. Það er kannski ástæða til að spyrja hv. þm. hvort hann sé talsmaður þess og tilbúinn að leggja til að lífeyrissjóðir sem hann hefur einhver forráð yfir eða áhrif á fjárfestu í þeim verkefnum sem Vinstri grænir hafa verið að nefna hér til sögunnar og ég hef skilið að fyrst og síðast ættu að koma úr ríkissjóði og skattgreiðendur ættu að standa undir. Væri hann tilbúinn að standa fyrir því að lífeyrissjóðirnir kæmu þar að verki?

Herra forseti. Kjarni málsins er sá að þrátt fyrir um margt málefnalega nálgun er veruleikinn eftirfarandi: Hv. þm. er á móti virkjunarframkvæmdum norðan Vatnajökuls. Hv. þm. er á móti því að reisa álver. Hann er á móti stóriðju. Hv. þm. er á móti því að Íslendingar eigi meiri hluta í slíkum verksmiðjum. Hv. þm. er líka á móti því að Íslendingar eigi minni hluta í slíkum verksmiðjum. Hv. þm. gefur sér, þrátt fyrir þann veruleika sem við blasir í öðrum verksmiðjum hérlendis, að slíkar breytingar séu að verða í áliðnaði að verið sé að tefla í tvísýnu. Á sama tíma er Alcan að sækja um stækkun, framleiðniaukningu í álverinu í Straumsvík. Á sama tíma er Kenneth Peterson í Hvalfirði, í Norðuráli, að sækja um stækkun, um framleiðniaukningu. Eru þessir stóru, öflugu aðilar að tefla málum í tvísýnu?

Hér rekst hvað annað á annars horn, herra forseti. Veruleikinn er allt annar en hv. þm. er hér að lýsa. Það er staðreynd málsins. Það er alveg sama hvað hv. þm. setur hér á margar ræður, við komum alltaf að kjarna málsins: Dómgreind hans brenglast af þeim sökum einum að hann byrjar frá vitlausum punkti, er á móti málinu hvað sem tautar og raular. Undan því verður ekki komist.