Jóhann Ársælsson (andsvar):
Hæstv. forseti. Ég dreg ekki í efa að menn muni standa við þessi orð. Ég vonast til að þessir starfsmenn geti orðið álíka hamingjusamir og þeir voru hjá Skráningarstofnunni þó að þeir telji greinilega, a.m.k. í bréfi sínu, að fyrirkomulag sem er núna sé betra en það sem starfseminni er ætlað í framtíðinni.
Ég verð að segja eins og er, að mér finnst að þau þrjú ár sem verið er að tala um sem reynslutíma á þetta fyrirkomulag sem hérna er lagt til að verði tekið upp séu of langur tími. Ef þetta skilar sér ekki strax --- ég held nefnilega að menn sjái þetta býsna fljótt hvað slysin varðar --- í fækkun slysa tel ég að menn þurfi að bregðast við og hafa ekki takmarkandi frest hvað þetta varðar. Ég hvet hæstv. ráðherra til að líta þannig á málið að ef menn telji að þetta ákvæði bindi að einhverju leyti verði því einfaldlega breytt þannig að endurskoðun fari fram strax og menn telja ástæðu til.