[24:58]

Félagsmálaráðherra (Páll Pétursson):

Herra forseti. Ég ætla ekki, klukkan eitt að nóttu, að taka þátt í kosningabaráttunni í Hafnarfirði til sveitarstjórnarkosninga. Mér skilst að hv. þm. Guðmundur Árni Stefánsson sé þegar búinn að vinna þær kosningar og þá er bara að láta þessar þrjár vikur líða, bíða svo og sjá hvað setur. Hv. þm. er meira að segja líka búinn að jarða Framsfl., ríkisstjórnina, núv. félmrh. og ég veit ekki hvað og hvað.

Ég lít svo á --- svo ég reyni að svara spurningu hv. þm. --- að það í fljótu bragði virðist eðlilegast að eignfæra þessar greiðslur í bókhaldi Hafnarfjarðarbæjar, þó með fyrirvara um að reikningsskilanefnd kunni að leggja annað til. Þetta frv. byggir á samkomulagi við Samband ísl. sveitarfélaga. Frv. lítur svona út vegna þess að það er samkomulag við Samband ísl. sveitarfélaga. Samband ísl. sveitarfélaga lagði áherslu á að ekki yrði gerður munur á eignarleigu og rekstrarleigu.

Verið er að ljúka þessu einsetningarátaki. Ég veit ekki til þess að neins staðar í öðrum sveitarfélögum séu uppi áform um rekstrarleigu með þeim hætti sem er í Hafnarfirði. Ég veit að Reykjavík hefur engin áform um einkaframkvæmd í grunnskólabyggingum. Auk þess eru sólarlagsákvæði í lögunum, þessi lög renna út 2005. Hér er um að ræða framlengingu á átaki og samkvæmt vilja Sambands ísl. sveitarfélaga var ekki gerður munur á þessari framkvæmd í Hafnarfirði og annars háttar skólabyggingaframkvæmdum.

Menn hafa rætt nokkuð um einkaframkvæmd á víðum grundvelli. Ég lít ekki svo á að Félagsbústaðir hf. byggi á einkaframkvæmd. Hins vegar er Reykjavík með stórkostlega rekstrarleigu, einkaframkvæmd, þ.e. íþróttahúsið í Grafarvogi sem einkaaðilar byggja og koma til með að reka. Reykjavíkurborg eignast það aldrei en kemur til með að greiða verulegar fjárhæðir í leigu af því húsi.

Varðandi það sem hv. 3. þm. Norðurl. e. sagði um núv. borgarstjórn í Reykjavík vil ég minna hann á að einn af forustumönnum Vinstri grænna er í núv. borgarstjórnarmeirihluta, er þar einn innsti koppur í búri, Árni Þór Sigurðsson borgarfulltrúi, sem kemur til með að vera í fyrsta sæti Reykjavíkurlistans í næstu borgarstjórnarkosningum. Ég veit ekki betur en að til standi að sami borgarstjóri verði áfram á næsta kjörtímabili svo framarlega sem Reykjavíkurlistinn heldur meiri hlutanum.