Kolbrún Halldórsdóttir:
Herra forseti. Ég get verið sammála hæstv. dómsmrh. um að standa þurfi vel að umferðaröryggismálum í landinu. Eins og ég benti á, herra forseti, í máli mínu hér áðan hefur meðvitað verið tekið á málefnum er varða ökuprófin á síðustu árum. Þær aðgerðir virðast hafa skilað árangri og þess vegna verð ég að ítreka spurningu mína, herra forseti:
Hvað er það sem rekur á eftir hæstv. ríkisstjórn að gera breytingar á framkvæmd ökuprófa í dag þar sem þær breytingar sem gerðar hafa verið upp á síðkastið virðast hafa skilað færri slysum meðal nýliða í akstri?
Herra forseti. Ég get ekki orða bundist varðandi hugmyndir hæstv. ráðherra um útboð og spyr: Er þetta enn ein einkavæðingarframkvæmd ríkisstjórnarinnar sem hér er á prjónunum?