[prenta uppsett í dálka] 33. fundur, 127. lþ.
Arnbjörg Sveinsdóttir:
Hæstv. forseti. Ég vil taka undir það mál manna að hér er um mjög góða skýrslu að ræða, og það hafa ferðaþjónustuaðilar látið mjög í ljósi. Hún vekur nýjar hugsanir og hugmyndir og þarna er um ákaflega mikilvægt vinnugagn að ræða. Þetta er vinnugagn þeirra sem eru að markaðssetja ferðaþjónustu hér á landi og eru á höttunum eftir nýjum tækifærum í menningu okkar.
Það er mikilvægt að hér er verið að ræða um almenna menningartengda ferðaþjónustu en ekki landshlutabundna. Við eigum auðvitað að reyna að koma þessari menningu okkar á framfæri í ládeyðunni þegar mest þörf er á því að nýta þær undirstöður og þá grunngerð, forseti, sem við eigum í ferðaþjónustu hér á landi.
