Frsm. 2. minni hluta fjárln. (Jón Bjarnason) (andsvar):
Herra forseti. Málið er brýnt fyrir sveitarfélagið Skagafjörð vegna vanda þess sérstaklega, og síðan er þetta málefni á landsvísu. Ef hv. þm. Vilhjálmur Egilsson vill bæta við tillöguna eða koma öðrum orðum inn til þess að koma megi til móts við þetta er sjálfsagt að skoða það.
En ég legg áherslu á að það á ekki að fara að sveitarfélögunum með þessum hætti, það á að leysa fjárhagsvanda þeirra á annan hátt en að taka af þeim eignir. Ég þakka hv. þm. Vilhjálmi Egilssyni fyrir stuðning við þau sjónarmið sem þarna eru, hvernig salan á Rafveitu Sauðárkróks til Rariks snýr að sveitarfélaginu Skagafirði.