Drífa Hjartardóttir:
Herra forseti. Ég þakka hv. fyrirspyrjanda, Kolbrúnu Halldórsdóttur, fyrir þessa fyrirspurn. Ég þekki töluvert til þessara mála í Rangárvallahreppi þar sem verið er að vinna að skipulagi fyrir allt sveitarfélagið og þar eru öll þessi skógræktarverkefni kortlögð.
Ég vil aðeins að gamni geta þess að landeyðingin fór ekki í umhverfismat og á Rangárvöllum er verið að græða upp eyðisanda með mjög merkilegum átaksverkefnum í skógrækt, bæði einkaaðila, Landgræðslu ríkisins og t.d. Aldamótaskógar, sem er búið að planta í á eyðisöndum. Og það er einstaklega ánægjulegt að upplifa bæði hvað landið tekur miklum breytingum við þetta --- við erum að endurheimta það --- og hvað fuglalífið hefur blómstrað, skordýralíf einnig, og annar gróður í skjóli þessara litlu skóga sem eru að koma upp.