Ögmundur Jónasson (um atkvæðagreiðslu):
Herra forseti. Við umræðuna um frv. í gær óskaði ég eftir því að fá á því staðfestingu að þetta frv. um heimild til að reisa álver í Reyðarfirði færi til umfjöllunar í umhvn. þingsins og efh.- og viðskn., auk umfjöllunar í iðnn. Ég hef ekki fengið nein svör við þessu. Við þingmenn Vinstri hreyfingarinnar -- græns framboðs munum ekki fallast á að samþykkja að málinu verði vísað til iðnn. nema við fáum yfirlýsingu þess efnis að málinu verði einnig vísað til umfjöllunar í efh.- og viðskn. og umhvn. þingsins. Það er óumdeilanlegt að þetta mál er á verksviði umhvn. og að sjálfsögðu einnig efh.- og viðskn. Þetta frv. fjallar um skattamál fyrirtækisins og fjallar um efnahagsmál eins og umræðan hér hefur borið með sér.
Þetta er krafa um sanngjörn og fagleg vinnubrögð.