Pétur H. Blöndal:
Herra forseti. Mér þykir heldur dragast úr hömlu að menn framfylgi þessari ályktun Alþingis sem samþykkt var og ég stóð í þeirri meiningu að ætti að framfylgja fyrir árslok árið 2000. Mér finnst þetta bera vott um hugleysi. Menn eru hræddir við áhrifin á markaðssetningu á fiski, menn eru hræddir við áhrifin á ferðamannaiðnað o.s.frv. Ég held að sá ótti sé ástæðulaus. Það er alveg hægt að sýna ferðamönnum bæði hvalskurð og lifandi hvali í sömu ferðinni og ég held að sögusagnir af áhrifum á sölu fisks í útlöndum séu orðum auknar. Ég skora á hæstv. sjútvrh. að bretta upp ermarnar og fara að taka upp þann sjálfsagða hlut að veiða hvali.