Jón Bjarnason (andsvar):
Herra forseti. Það er svolítið skondið og hálfdapurlegt að verða hér að hlusta á mælt fyrir lögum þar sem kveðið er á um að 14 og 15 ára unglingar megi ekki fara á sjó, þó ekki væri nema til grásleppu úti fyrir löndum sínum. Þetta hljómar framandi fyrir okkur sem erum uppalin við þetta sem hluta af hinu daglega lífi, að fara á sjó á grunnslóð. Ég tel að það ætti að skoða þetta mál örlítið betur.
Enginn hér mælir gegn því að einhverjar takmarkanir séu á því að unglingar undir 18 ára aldri megi vera á sjó. En það er spurning hvort ekki megi finna leið, t.d. við ákveðnar veiðar og í ákveðinni fjarlægð frá ströndum landsins, til þess að þeir mættu vera á sjó.
Þetta er hluti af því að ala upp sjómannastétt. Ég hugsa að flestir sem nú eru í sjómannastétt landsins eigi sér þennan bakgrunn. Ég hygg að ef þessi lög verða innleidd óbreytt verði æ erfiðara að manna flotann. Ég býst við að skilgreining á skólaskipum eða æfingaskipum sé það þröng að það mætti ekki tengja það þarna inn.
Virðulegi forseti. Ég vil vekja athygli á því að þarna ætti að huga að því hvort ekki mætti hafa ákveðnar undanþágur eftir veiðiaðferðum, eftir staðsetningu, til að við getum haldið hér nokkurn veginn eðlilegu íslensku samfélagi.