jöfnun námskostnaðar.
Virðulegi forseti. Ég ítreka bara það sem ég sagði áðan, mér finnst mikilvægt að nefndin fari mjög vel yfir þessa tvo liði. Eins og hv. þm. Sigurður Ingi Jóhannsson bendir á er sjóðurinn mjög mikilvægur í að tryggja að allir nemendur eigi aðgang að framhaldsskólanámi. Ég vil samt líka benda á að auðvitað hefur framboð á námi í framhaldsskóla í heimabyggð stóraukist. Ég nefni sem dæmi að nú geta nemendur í Fjallabyggð stundað nám í framhaldsdeild á Ólafsfirði og Siglufirði, og nýta sér það. Nemendur á Þórshöfn stunda framhaldsskólanám í sinni heimabyggð, þ.e. nemendur sem koma úr 10. bekk, þannig að við þurfum að horfa á það í því samhengi að það er æskileg þróun, mundi ég telja, að framboð á framhaldsskólanámi sé sem víðast, a.m.k. fyrir nemendur undir þessum 18 ára mörkum sem við miðum við.
Að öðru leyti get ég tekið undir það með þingmanninum að álag á framhaldsskólakennara er mikið. 96% útskriftarnemenda úr 10. bekk sóttu núna um framhaldsskólavist og það er hæsta hlutfall nokkru sinni þannig að við sjáum fram á að stórfelldar breytingar hafa orðið á þessu kerfi. Það er mikið álag á svona tímum.