ríkisábyrgð á lántöku Tryggingarsjóðs innstæðueigenda og fjárfesta.
Frú forseti. Ég er sammála hv. þingmanni, þetta er ótrúleg röksemdafærsla. Þetta er eins og við kenndum Rússum um kommúnismann, refsuðum einstökum Rússum fyrir að þeir voru með kommúnisma í 70 ár og gerðu alls konar hluti. Fólkið sjálft getur ekki borið ábyrgð á þessu. Fiskvinnslukona á Raufarhöfn getur ekki borið ábyrgð á því sem útrásarvíkingarnir gerðu. Ef þetta er reyndin, eins og kom fram í ræðu eins þingmanns um daginn, að við berum ábyrgð hvert á öðru vil ég líka fá að sjá reikningana hans og heimilisbókhaldið og fylgjast með því daglega hvað hann er að gera. Ef ég á að bera ábyrgð á hans fjármálum hlýt ég að mega fylgjast með þeim frá degi til dags.
Þetta er fráleit röksemdafærsla. Þeir sem gerðu þessa samninga, þeir sem lánuðu þeim o.s.frv., bera ábyrgð á þessu, ekki ég og aðrir Íslendingar.