ríkisábyrgð á lántöku Tryggingarsjóðs innstæðueigenda og fjárfesta.
Virðulegur forseti. Ég skal reyna að útskýra þetta mál eins og mér heyrðist það vera. Fyrir fjárlaganefnd komu fjórir lögspekingar. Sá þeirra sem taldi nánast ótvírætt að þetta væri brot á stjórnarskrá var Sigurður Líndal. Það hefur fengist staðfest með grein hans í Morgunblaðinu frá því í gærmorgun að svo væri. Eiríkur Tómasson var ekki sama sinnis en hann hafði miklar efasemdir um eitt atriði í þessu máli og það var að ríkisábyrgðin væri ótakmörkuð í tíma og í umfangi. Það var atriði sem honum leist ekki á þótt hann teldi ekki endilega að það væri brot á stjórnarskránni. Ragnhildur Hjaltadóttir, að mig minnir að hún heiti — (Gripið fram í: Helgadóttir) Helgadóttir, virtist vera nokkuð sama sinnis og Sigurður Líndal hvað varðaði sum atriði málsins en Björg Thorarensen var aftur á móti þeirrar skoðunar að hér væri ekki um brot á stjórnarskrá að ræða. Nú er hér um munnlega skýrslu mína frá þessum fundi að ræða og því kannski ekki rétt að byggja ítarlega á henni. Það var óskað eftir skriflegum greinargerðum (Forseti hringir.) en því var hafnað.