stjórn fiskveiða.
Frú forseti. Ég las af athygli tillögur Framsóknarflokksins í sjávarútvegsmálum þar sem var sama grunnstefið og lagt er til í þessu frumvarpi um aðgerðir nú þegar á þessu ári og því næsta. Þær lúta fyrst og fremst að styrkingu hinna byggðatengdu þátta sem hafa verið hvað harðast gagnrýndir í núverandi kvótakerfi, þ.e. það óöryggi sem ýmis byggðalög hafa þurft að þola vegna núverandi kvótakerfis. Almenningur í sjávarbyggðunum horfir á eftir aflaheimildum á einum degi í burt án þess að hafa nokkuð um málin að segja.
Það má vel vera að menn geti fundið í því reikningslega hagræðingu en fyrir samfélagið er dýrt að búa við slíkt óöryggi. (Forseti hringir.) Þetta verður allt að fara saman. Það er meginstefið og tilgangurinn í því (Forseti hringir.) frumvarpi sem hér er til umræðu, frú forseti.