![](http://www.althingi.is/myndir/althlit.gif)
[14:13]
Fyrirspyrjandi (Ögmundur Jónasson):
Hæstv. forseti. Nú er liðið á annan áratug síðan aðgengismál í Þjóðleikhúsinu, leikhúsi allra landsmanna, voru til umfjöllunar á Alþingi. Þá var lögð fram þáltill. um bætta aðstöðu hreyfihamlaðra í Þjóðleikhúsinu. Gerð var áætlun um nauðsynlegar breytingar og framkvæmd þeirra og á fjárlögum var í ein þrjú ár gert ráð fyrir sérstöku fjármagni til þessara framkvæmda.
Þegar viðamiklar breytingar voru gerðar á Þjóðleikhúsinu fyrir nokkrum árum var að nokkru leyti komið til móts við þær hugmyndir sem fyrir lágu. Meðal annars var komið fyrir salernum fyrir fatlaða í kjallara hússins og á annarri hæð. Hins vegar var ekki séð til þess að fólk í hjólastólum kæmist niður í kjallara eða upp á annarri hæð eins og ætla mætti að eðlilegt væri. Í húsinu er engin lyfta fyrir leikhúsgesti, engin aðstaða fyrir hjólastóla er í aðalsýningarsal hússins, fólk í hjólastól getur ekki komið á sýningar á Litla sviðinu eða á Smíðaverkstæðinu eða notið veitinga í veitingasal. Í ljósi þessa er þeirri fyrirspurn beint til hæstv. menntmrh. hvað hann hyggst gera til þess að bæta aðgengi fyrir fatlaða við Þjóðleikhúsið, leikhús allra landsmanna.