[16:07]
Jón Kristjánsson (andsvar):
Herra forseti. Hv. 15. þm. Reykv. kvartar undan því að það hafi ekki verið hægt að ræða málefni Ríkisspítalanna og stóru spítalanna á höfuðborgarsvæðinu við 2. umr. fjárlaga. Ég verð að minna hann á það af því að hann virðist hafa gleymt því að aðgerðir í heilbrigðismálum voru kynntar við 2. umr fjárlaga. Hins vegar hafa málefni stóru spítalanna verið stöðugt viðfangsefni í fjárlagaumræðu síðustu 4--5 árin og lengur. Vandkvæði þeirra eru ekki nýtt vandamál, komið til vegna þess að núverandi stjórnarliðar vilji níðast á fólki í landinu. Það er mikil útgjaldaaukning í þessum málaflokki og mikil fjárþörf. Svo hefur alltaf verið og umræður hafa snúist um það hvernig best sé að mæta því, hvernig hægt sé að hagræða í þessum málaflokki og sú umræða heldur áfram. Það verður viðfangsefni yfirstandandi árs og það verður viðfangsefni næstu fjárlaga að reyna að ná landi í þessum efnum.
Það er alveg ljóst að á síðasta ári hafa fjárframlög til spítalanna á höfuðborgarsvæðinu vaxið þótt útgjaldaþörfin sé enn meiri. Það er því stöðugt viðfangsefni hvernig eigi að mæta þessum vanda.