[16:33]
Magnús Stefánsson (andsvar):
Virðulegur forseti. Ég hef orðið var við að hv. þm. er óhress með niðurskurð á höfuðborgarsvæðinu í vegamálum. Ég hygg að allir þingmenn alls staðar af landinu séu ekkert mjög hressir með það að þurfa að skera niður fjármagn til vegaframkvæmda. Í þeim efnum falla allir undir sama hattinn. Hv. þm. talar um sanngirnissjónarmið. Ég get líka sagt að ég hygg að hægt væri að færa rök fyrir því að niðurskurður í vegáætlun ætti eingöngu að koma fram í framkvæmdaátaki. Það væri hægt að færa rök fyrir því. En það eru víðar sanngirnissjónarmið en hv. þm. nefndi og þess vegna hafa þingmenn ekki deilt á að tekið sé á þeim málum með þeim hætti sem hér liggur fyrir. Í umræðunni hafa komið fram raddir þingmanna á þéttbýlissvæðinu sem hafa mótmælt niðurskurði á framkvæmdaátakinu. En ég vil benda á að það er hægt að færa rök fyrir hinu líka.