Einar Oddur Kristjánsson (andsvar):
Herra forseti. Ég hlýt að leggja mitt mat á stöðu íslenskra fyrirtækja. Ég get ekki svarað fyrir aðra og það eru engin rök í málinu þótt einhverjir menn segist í blaðaviðtali hvergi hræddir. Nei, ég held að menn séu ekkert hræddir. En það eru engin rök í málinu, sérstaklega þegar átt er við fyrirtæki sem er ekki einu sinni á markaði. Það er bara lokað. Það er von að þeir séu óhræddir.
Ég veit ekki hvað menn kalla grundvallarmun og hvað menn kalla stigsmun. En í frv. ríkisstjórnarinnar er kveðið skýrt á um að bein fjárfesting sé útlendingum algjörlega óheimil. Í frv. fjórmenninganna, flokksbræðra minna, er talað um 49%. Ef þetta er stigsmunur, þá mega menn kalla það stigsmun. En ég tel þetta grundvallarmun.