Fyrirspyrjandi (Hjálmar Jónsson):
Herra forseti. Frá því að þessi fyrirspurn var lögð fram í þinginu hefur nefnd á vegum hæstv. menntmrh. skilað áliti, nefnd undir forsæti formanns útvarpsráðs, um hagkvæmni þess að flytja sjónvarpið í útvarpshúsið við Efstaleiti 1. Samkvæmt fréttum fjölmiðla telur nefndin þann kost bestan að flytja sjónvarpið í Efstaleiti.
En fyrirspurnin stendur einnig og ekki síður um hagkvæmni þess að flytja og væri gott að fá svör hjá hæstv. menntmrh. um það og þá í leiðinni hvenær hafist verði handa um flutninginn og hvenær megi búast við að þessum flutningi ljúki, hversu mikill rekstrarsparnaður á ári verði af flutningnum og hvort ekki sé eðlilegt að nota þann sparnað til þess að koma sjónvarpsmerkinu til allra landsmanna.