Ásta R. Jóhannesdóttir (andsvar):
Herra forseti. Það er alveg furðulegt að framsóknarmenn skulu ekki hafa gert sér grein fyrir því í kosningabaráttunni að það þyrfti að ná tökum á ríkisfjármálum. (Gripið fram í: Og láta stúdenta greiða þá niður?) Nú á að láta stúdenta greiða þá niður. (Gripið fram í: Skoða allt í samhengi.) Það þarf að skoða allt í samhengi. Það fór ekki mikið fyrir því að talað væri um það að ná tökum á ríkisfjármálum þegar var verið að gefa loforðin á kosningafundunum í skólunum í Reykjavík.
Ég vil taka það fram vegna orða hv. þm. að sá þingmaður sem hér stendur tók ekki þátt í stefnumótun fyrir síðustu kosningar hjá Framsfl. Aftur á móti hlustaði hann gaumgæfilega á frambjóðendur Framsfl. á öllum þeim kosningafundum í skólum sem voru í hér borginni og það fór ekki á milli mála að menn buðu heldur betur annað en það sem kemur fram í þessu frv. um skólagjöld. Það var heldur betur annar tónn í mönnum. Og þarna situr einn sem nú er orðinn hæstv. iðn.- og viðskrh. sem var einmitt að yfirbjóða alla og sérstaklega gagnvart námsmönnum. Hvar eru loforðin nú? (Gripið fram í: Yfirbjóða námsmenn?) Yfirbjóða aðra frambjóðendur og bauð námsmönnum lægri gjöld og betri námslán.