![](http://www.althingi.is/myndir/althlit.gif)
Hjörleifur Guttormsson:
Virðulegur forseti. Þau eru mörg álitaefnin sem tengjast þessu frv. Hér var af minni hluta til lagt til meiri opnun varðandi fjárfestingu erlendra aðila en frv. gerði ráð fyrir og í þeim búningi sem það nú er. Alþb. var á móti slíku og við styðjum afgreiðslu málsins þrátt fyrir marga meinbugi sem á því eru. Ég vek athygli á því atriði sem varðar fjárfestingarheimildir erlendra aðila í orkulindum landsins. Það hefur komið fram að þar eru algerlega ófrágengin stór atriði sem varða þjóðarhagsmuni. Hæstv. iðnrh. upplýsti í gær að ekkert gengi í að ganga frá málum milli stjórnaraðila varðandi lagasetningu til að tryggja íslenska hagsmuni.
Ég styð sem sagt framgang þessa máls hér en ég vek athygli á þessari hroðalegu stöðu sem við erum bundin í vegna aðildar að EES-samningi.