![](http://www.althingi.is/myndir/althlit.gif)
Rannveig Guðmundsdóttir:
Virðulegi forseti. Við höfum gagnrýnt harðlega vinnubrögð ráðherra og tilurð þessa frv. sem er nýr og framandi þáttur í samskiptum ríkisstjórnar við launþegasamtökin í landinu. Við teljum að með þessum vinnubrögðum sé varpað fyrir róða grundvelli þeirrar samvinnu sem skapaði þjóðarsátt og efnahagsbata. Sameinuð íslensk verkalýðshreyfing hefur varað stjórnvöld við að breyta samskiptareglum á vinnumarkaði með slíkum yfirgangi og varar eindregið við þeim breytingum á réttarstöðu launþega og samtaka þeirra sem felast í frv. Þrátt fyrir að hörð andstaða í þingsal, andstaða verkalýðshreyfingarinnar og málefnaleg umfjöllun félmn. hafi gerbreytt frv. frá upprunalegri mynd þannig að nú má segja að það sé stefnu- og markmiðslaust plagg, þá hafnar þingflokkur Alþfl. þessari lagasetningu og íhlutun í innri málefni stéttarfélags sem í henni felst.
Virðulegi forseti. Við styðjum að málinu verði vísað til ríkisstjórnar en munum að öðrum kosti sitja hjá við breytingartillögur og greiða atkvæði gegn frumvarpsgreinum. Ég segi já.