Svavar Gestsson:
Virðulegi forseti. Hér er gerð fjórða og síðasta tilraunin til þess að leyfa kennurum að koma nálægt stjórn skólanna um það að þeir fái að tilnefna fulltrúa í starfsgreinaráð, þ.e. viðkomandi starfsgreinar kennara. Kennarar í trésmíðum fái t.d. að tilnefna fulltrúa í starfsgreinaráð. Þetta er tilraun sem hér er gerð að lokum, hæstv. forseti, eftir að öllum hinum hefur verið hafnað. Það er ekki einleikið hvað meiri hlutinn virðist leggja kennarastéttina í einelti í þessari atkvæðagreiðslu undir forustu skólameistarans mér á hægri hönd. Ég styð að sjálfsögðu tillöguna.