Vilhjálmur Egilsson:
Hæstv. forseti. Ég styð að sjálfsögðu þessa brtt. frá meiri hluta efh.- og viðskn. sem kveður á um það að setja þak á þann söluhagnað sem hægt er að skattleggja í 10% þrepinu. Ég vek athygli á því að ef arður og vaxtatekjur hefðu líka verið látnar taka til þessa dags hefði komið upp sú staða að skatthlutfallið hefði nánast nálgast eignaupptöku. Ég vek athygli á því að 10% nafnvaxtaskattur þýðir við mjög lágt verðbólgustig almennt kannski 20--30% skattlagningu á raunvexti. Þegar skattaprósenta á slíka nafnvexti er komin upp í 40--50% er raunvaxtaskattlagningin í ýmsum tilvikum komin yfir 100% og í algengum verðbólgutölum milli 80 og 90%. Því tel ég að það sé alveg ófært að leggja á slíkan eignaupptökuskatt.