Frsm. meiri hluta efh.- og viðskn. (Vilhjálmur Egilsson) (andsvar):
Hæstv. forseti. Vegna orða hv. þm. vil ég taka fram að það er í sjálfu sér ekkert einhlítt hvernig haga beri tekjuöflun eða tekjutilfærslum í kringum þessa breytingu sem verið er að gera. Það er í sjálfu sér enginn kostur góður í þeim efnum. En ég hygg að þó hafi verið illskást að fara þá leið sem farin er, þ.e. að draga úr endurgreiðslum á virðisaukaskatti vegna vinnu á byggingarstað.
Varðandi vörugjaldskerfið sjálft verð ég að segja að ég undrast oft hvað hv. þm. býður sig fram í því að vera sérfræðingur í því að mismuna svo milli vörutegunda eins og fram kemur í vörugjaldskerfinu yfirleitt. Þessi vörugjöld hafa tel ég verið ein stærstu mistök sem hafa verið gerð í okkar skattkerfi, því miður. En það er jafnerfitt að komast út úr því eins og það var kannski auðvelt að byrja á því.
Varðandi snyrtivörurnar sem hann býsnaðist t.d. mikið yfir, þá ætla ég ekki að halda því fram að hv. þm. skilji ekki konur í því sambandi. En hins vegar vil ég benda honum á að töluvert stór hluti af versluninni einmitt með snyrtivörur er farinn úr landinu og er á vegum ríkisins í Flugstöð Leifs Eiríkssonar. Ég hygg að markaðshlutdeildin þar sé líklega milli 40% og 50% af öllum snyrtivörumarkaði í landinu. Það segir sig náttúrlega sjálft að það eru kannski ekki svona efnaminni konur sem stunda þá verslun heldur þær sem hafa meira á milli handanna og ferðast eða eins og stundum kemur fyrir að þegar við hv. þm. erum á leið til útlanda, þá erum við látnir hafa innkaupalista hjá kvenfólkinu í fjölskyldunni þannig að við komum nú ekki tómhentir heim.