Einar K. Guðfinnsson:
Virðulegi forseti. Þar sem hér er verið að greiða atkvæði um meginefnisatriði þessa frv., sem lýtur að stjórn veiða smábáta, þá vil ég lesa eftirfarandi texta, með leyfi virðulegs forseta:
,,Þannig háttar til að á flestum þeim stöðum þar sem mest hefur horfið af aflaheimildum hefur smábátaútgerð dafnað og tekið úr sárasta sviðann af skerðingum. Þar er líka eina vonin til aukningar á hlutdeild þessara staða í þorskveiði. Því ætla ég að vona að Alþingi Íslendinga beri gæfu til að koma frv. sjútvrh., sem byggir á samningi hans og samningi smábátaeigenda, í gegn hið fyrsta.``
Þetta er úr leiðara sjómannablaðsins Vestfirðings, málgagns Alþb. á Vestfjörðum. Ég er sammála þessu og segi því já.