[15:17]
Kristín Ástgeirsdóttir:
Hæstv. forseti. Á fundi félmn. í morgun kom fram hjá fulltrúa Alþýðusambands Íslands að heyrst hefði að draga ætti úr og jafnvel hætta þeirri starfsmenntun sem nú er veitt í Fjölbrautaskólanum í Breiðholti, þ.e. þegar Borgarholtsskólinn nýi tekur til starfa.
Í umræðum sem áttu sér stað fyrir nokkrum dögum um framhaldsskólafrv. kom fram að þingmenn og reyndar skólamenn eru þeirrar skoðunar að mjög mikil þörf sé á því að auka starfsmenntun í landinu. Því vil ég spyrja hæstv. menntmrh.: Er eitthvað hæft í þeirri fullyrðingu að það eigi að draga úr starfsmenntun í Fjölbrautaskólanum í Breiðholti?