[15:21]
Ísólfur Gylfi Pálmason:
Herra forseti. Ég vil leyfa mér að beina fyrirspurn til hæstv. landbrh. varðandi raforkusölu til ylræktarbænda. Fyrirspurnin er svohljóðandi:
Er landbrh. tilbúinn að beita sér fyrir samningum við Landsvirkjun og Rarik þannig að ekki komi til þess að ylræktarbændur búi við viðvarandi hættu á að rafmagn til lýsingar í gróðurhúsum verði rofið eins og þegar hefur gerst nú í haust? Hér er að mínu mati um ófremdarástand að ræða sem þarf að ná samkomulagi um svo fljótt sem auðið er. Þetta hefur mikil áhrif á verðmætasköpun garðyrkjubýla í landinu.