[prenta uppsett í dálka] 39. fundur
[15:32]
Samgönguráðherra (Halldór Blöndal) (andsvar):
Herra forseti. Það var svo þegar við vorum saman í ríkisstjórn, ég og hv. þm., að hvert ráðuneyti reyndi að gera grein fyrir því við undirbúning fjárlaga hvaða fjármuni vantaði til þess að geta staðið sæmilega í skilum með þau málefni sem heyrðu undir ráðuneytið. Meðal þess sem heyrði undir hv. þm. Jón Baldvin Hannibalsson var flugstöðin á Keflavíkurflugvelli og honum bar auðvitað sem utanrrh. að leggja málið fyrir við fjárlagagerð og í sambandi við fjáraukalög hverju sinni og þýðir ekki að vitna til einhverra manna sem voru í ríkisstjórn áratug fyrr eða skella skuldinni á samráðherra sinn sem er alls ekki með þennan málaflokk, Keflavíkurflugvöll. Ábyrgðin er hans. Hann var utanrrh. um sjö ára tímabil, fjmrh. áður. Þegar við hlustuðum á það sem hv. þm. Ólafur Ragnar Grímsson sagði, þá var hann að tala um að öll málin hefðu verið í óreiðu þegar hann kom í sæti fjmrh. á eftir hv. þm. Jóni Baldvini Hannibalssyni. Af hverju tóku þeir ekki til ef allt var í óreiðu?
