![](http://www.althingi.is/myndir/althlit.gif)
[14:41]
Svanfríður Jónasdóttir:
Virðulegi forseti. Ég þakka fyrirspyrjanda fyrir að fitja upp á svo mikilvægu máli sem læsi er. Við höfum alla jafnan gengið út frá því sem nokkuð vísu að allir í okkar samfélagi sem eru komnir á tiltekinn aldur væru læsir og gætu nýtt sér texta. Það kom einna best í ljós hverjum augum við lítum þá sem geta ekki lesið eða eru treglæsir þegar fjölmiðlar gerðu skil því frábæra átaki sem Iðnskólinn í Reykjavík fór í varðandi treglæsa nemendur. Það mátti helst skilja á túlkun fjölmiðla að eitthvað einstakt væri þar á ferðinni.
Ráðherra vitnaði áðan í það sem fyrirhugað er að gera, bæði vegna framhaldsskólanema, vegna fullorðinna og annarra sem eiga við lestrarörðugleika að stríða. Talað er um að um 3--4% úr hverjum árgangi kunni að stríða við dyslexíu. Það væri forvitnilegt í þessari umræðu að fá að vita hvort ráðherra byggir á könnunum, hvort það liggja fyrir kannanir um læsi Íslendinga og hvað þær hafa leitt í ljós umfram þá tölu sem hann nefnir hér og menn henda sín á milli í umræðunni.