Kristinn H. Gunnarsson (andsvar):
Herra forseti. Ég vonast til að hv. þm. muni síðar í umræðunni svara ítarlegar fyrirspurn minni því að vissulega er greining þingmannsins á vandamálinu hárrétt að mínu viti. Að búa við fiskveiðistjórnarkerfi eins og við búum við í dag þar sem útgerðarmönnum er falinn ákvörðunarrétturinn og umráðarétturinn getur haft í för með sér gagnstæða hagsmuni hans og íbúanna í byggðarlögunum. Spurningin er hins vegar: Hver eru úrræði Kvennalistans við þessu vandamáli sem hv. þm. vakti athygli á í ræðu sinni áðan? Eru úrræðin þau að taka forræðið af útgerðarmanninum? Er úrræðið að leggja á veiðileyfagjald? Hvernig má það vera að það breyti þessu vandamáli? Eða hefur Kvennalistinn eitthvert annað úrræði sem hann á eftir að gera grein fyrir í umræðunni? Ég vænti þess að þingmaðurinn lýsi skoðunum síns þingflokks á lausnum á vandamálinu því það er kjarni málsins hvernig menn ætla að leysa þetta vandamál sem hér hefur verið dregið fram í dagsljósið.