![](http://www.althingi.is/myndir/althlit.gif)
Ásta R. Jóhannesdóttir (andsvar):
Herra forseti. Ég vil þakka hv. þm. fyrir þetta yfirgripsmikla svar á stuttum tíma. Ég get tekið undir það að ég tel þessa dönsku leið vera leið sem hefur skilað árangri. Og eins og kom fram í máli hv. 13. þm. Reykv. áðan þá hefur þessi leið verið farin og vitnaði hann til hv. þm. Sighvats Björgvinssonar sem var með fjárveitingar í að stytta biðlista eftir ákveðnum aðgerðum og gafst það ágætlega. Frekari umræðu um sparnað á höfuðborgarsvæðinu ætla ég að geyma til síðari tíma en minni á að hér er aðalheilbrigðisþjónustan, þ.e. bæði hátæknisjúkrahúsin stóru eru hér og sinna öllu landinu. Við skulum hafa það hugfast þegar við ræðum þessi mál.