[prenta uppsett í dálka] 20. fundur
Kristinn H. Gunnarsson (andsvar):
Herra forseti. Því rifja ég þetta upp af því mér finnst þetta skipta máli í umfjöllun um byggðastefnu. Eins og segir í ræðu hv. þm. Jóns Baldvins Hannibalssonar, með leyfi forseta: ,,Aðalatriði er að þessar nýju stjórnsýslueiningar fái í hendur meira vald. Að kjörið verði með lýðræðislegum hætti í stjórnir þeirra til fylkisþinga eða fylkisstjórna og að fylkin fái sjálfstætt skattlagningarvald.`` Ég er nefnilega alveg sammála þessu. Ég er þeirrar skoðunar að það sem best mundi duga landsbyggðinni til að halda sínum hlut og eflast væri að hún hefði málin í eigin höndum í stað þess að draga málin öll hingað til Reykjavíkur. Og síðan er sett upp einhver stofnun sem á að deila út til okkar til baka því valdi sem búið er að taka af okkur. Ég er þeirrar skoðunar að við eigum að færa valdið út á land og héðan í burtu. Ég er ekki að fara í andsvar til að andmæla ræðu hv. þm. Gísla S. Einarssonar. Ég er bara að spyrja hann um afstöðu hans til þessa máls sem mér finnst vera kjarni málsins.
