Svavar Gestsson (andsvar):
Virðulegi forseti. Ég er alveg sammála hv. þm. um það að stjórnarspursmálin í sambandi við þetta frv. eru aukaatriði, enda hef ég aldrei einu orði tjáð mig um það mál en mun hins vegar gera grein fyrir þeim sjónarmiðum á eftir.
Aðalgallinn við málið finnst mér vera sá, eins og það er sett upp, að þar er lögð höfuðáhersla á að eignaraðilar, eins og þeir eru kallaðir, fái útborgaðan arð. Það sem ég óttast er að það komi niður á hinum almennu orkunotendum í landinu og skapi þar með ófrið um Landsvirkjun. Það er það sem ég hef áhyggjur af, hæstv. forseti.