[prenta uppsett í dálka] 34. fundur
Sturla Böðvarsson:
Virðulegi forseti. Ég þakka hv. 8. þm. Reykv. fyrir þessa fyrirspurn sem vekur athygli á mikilvægu máli. Hann vitnaði til viðtals í Morgunblaðinu á sínum tíma og sem vakti verulega mikla athygli. Á þessum stutta tíma hér gefst ekki mikið tækifæri til að ræða þetta efnislega. En vegna þess að ég hef nokkuð komið að málum Þjóðminjasafnsins vil ég segja í fyrsta lagi að það er fjarri lagi að þar ríki metnaðarleysi hvað varðar fornleifarannsóknir. Þjóðminjaráð hefur markað þá stefnu að fornleifaskráning sem er auðvitað aðalatriði málsins og mikilvægasta atriðið í fyrstu, og fornleifarannsóknir verði forgangsverkefni á vegum Þjóðminjasafnsins. Í því sambandi var ráðinn sérstakur verkefnisstjóri sem sinnir skipulagi og undirbúningi fornleifaskráningar á vegum Þjóðminjasafnsins. Auk þess koma aðrir að því verki.
Einnig vil ég nefna að á vegum þjóðminjaráðs hefur verið unnið að mjög viðamikilli stefnumótunarvinnu til þess að styrkja m.a. fornleifaskráningu og fornleifarannsóknir.
