[prenta uppsett í dálka] 47. fundur
Svavar Gestsson (um fundarstjórn):
Virðulegi forseti. Ég vísa til þess að fyrr í kvöld sagði hæstv. forseti Guðni Ágústsson, hv. þm. Guðni Ágústsson, að hann ætlaði að kanna hvort hann fyndi samkomulagið. Nú hefur hann sem sagt fengið tíma til þess í um það bil klukkustund að leita að samkomulaginu og birtist nú glaðbeittur. Spurningin er hvort það væri ekki ráð að gefa hlé augnablik, í 10 mínútur eða svo, meðan það er kannað hvort ekki er alla vega hægt að fá það upplýst hvenær ætlunin er að ljúka umræðunni núna þannig að það verði ekki farið að halda hérna fundi í þýðingarleysi inn í nóttina. Ég vildi mælast til þess við hæstv. forseta að það yrði kannað hvort ekki mætti gera hlé til þess að fá svar við þeirri spurningu hvenær ætlunin er að ljúka þessum fundahöldum sem þegar eru orðin nógu löng.
