Jón Kristjánsson (andsvar):
Herra forseti. Flutningur þessarar tillögu sætir nokkrum tíðindum. Hér hafa verið í gangi viðræður um sameiningarmál vinstri flokkanna og þetta hefur verið eitt aðalmálið á þeim vettvangi. Ég tek fram að hér er um skynsamlega tillögugerð að ræða. Hér er lagt til að þverpólitísk nefnd verði kosin til að móta stefnu í þessum málum og þykir mér sú hugsun ekki fráleit.
Ég spyr: Er þetta samkomulag í sameiningarviðræðunum milli þeirra sem vilja fella niður tekjuskattinn og leggja veiðigjald á sjávarútveginn í staðinn? Það er nauðsynlegt að fá upplýst hvort þetta sé almennur vilji í þeim flokkum sem hafa verið að sameinast í þessum mikilvægu málum. (Gripið fram í: Allir vilja vera með.) Ég tek fram að sú hugsun að kafa ofan í þessi mikilvægu mál og hugmyndin um gjaldtöku en ekki skattlagningu er ekki framandi. Hitt er nauðsynlegt að fá upplýst hvort rík samstaða er í stjórnarandstöðunni um þetta mál.